3 mahalagang resolusyon, tinalakay sa SB kabacan kahapon

By: Mark Anthony Pispis

(Kabacan, North Cotabato/ March 13, 2015) ---Nakatakda nang isalang sa 3^rd and final reading ang Municipal Ordinance no. 2014-004 Series of 2014 matapos itong pumasa sa 2^nd reading sa isinagawang Sagguniang Bayan Session kahapon.

Ayon kay Committee on Transportation Vice Chairman Hon. Councilor Reyman Saldivar sa panayam ng DXVL News, plantsado na umano ang nasabing ordinansa matapos ang mga serye ng kanilang ginwang konsultasyon at pagpupulong kasama ang mga trysikad Drivers at Operators.

Dagdag pa ng opisyal na magiging epektibo ang nasabing batas sa susunod na taong 2016.

Sa halip na isang beses kada isang taon ang pagkuha ng prangkisa ng mga trysikad drivers at operators ay magiging isang beses na lamang tuwing dalawang taon.

Samantala, nagpasa naman ng resolusyon si Hon. Councilor Rosman Mamaluba tungkol sa paghingi ng tulong sa Provincial Government of Cotabato sa pagkakaroon ng artipisyal na ulan o mas kilala sa tawag na cloudseeding.

Anya, ang pangunahing layunin umano ng nasabing resolusyon ay upang iparating sa pamahalaang panlalawigan ang kalagayan ng bayan ng Kabacan hinggil sa narasang matinding init nitong mga nakaraang araw.

Lubos umanong naapektuhan ang mga tanim ng mga magsasaka sa bayan dahil sa nararanasang init at kung magpapatuloy pa ito ay kukulangin na ng suplay ng tubig ang mga irigasyon sa bayan na ang karamihan sa mga ito ay nakakunekta sa Kabacan River.

Umaasa naman ang opisyal na agaran itong tutugunan ng Provincial Government at nang National Government.

Samantala nagpasa rin ng resolusyon si Hon. Councilor Herlo Guzman Sr. sa direktiba narin ni Mayor Herlo Guzman Jr. hinggil sa paghingi ng karagdagang ambulansya sa Philippine Charity Sweepstakes Office o PCSO.

Layon ng nasabing panukala na mas mapagtuunan ng pansin ang pangangailangan ng mga mamamayan ng Kabacan at sa mga karatig minisipalidad hinggil sa serbisyong ibinibigay ng nasabing sasakyan.