PNP North Cotabato, naka full alert

(North Cotabato/ January 25, 2015) ---Inilagay na sa full alert status ng Cotabato Police Provincial Office ang antas ng seguridad ng kapulisan matapos ang muling pagsiklab ng sagupaan ng rebeldeng grupo at Special Action Force ng PNP sa bahagi ng Mamasapano, Maguindanao ngayong araw.
 

Ito ayon kay P/SSupt. Danilo Peralta, Cotabato Police Provincial Director sa panayam sa kanya ng DXVL News upang maiwasan ang spill over ng nasabing kaguluhan.

Bagama’t hindi pa kinumpirma ng opisyal kung ilan ang bilang ng namatay sa nasabing sagupaan, nilinaw naman nito na may namatay ng miyembro ng SAF.

Batay sa ulat ng PNP Intel umaabot na sa 11 ang naiulat na namatay sa grupo ng Special Action Force o SAF at di pa mabilang sa panig ng Bangsamoro Islamic Freedom Fighters o BIFF sa engkwentro sa Brgy. Pidsanbawan sa nasabing lugar.

Sa ulat ng kapulisan, tatlong High Powered Firearms ng PNP SAF ang narekober ng grupo ni Kumander Visayan a buhat sa pangkat ng BIFF.

Habang dalawa naman ang kumpirmadong namatay sa pangkat ni Kumander Resbak ng 105 based Command ng MILF na kinilalang sina Kansa at Sala.

Hanggang sa mga oras na ito ay patuloy pa ang sagupaan sa nasabing lugar. Rhoderick Beñez