Pagkakaisa ng Tri-People sa Cotabato tema ng itinatayong provincial museum

By: Jimmy Sta. Cruz

AMAS, Kidapawan City (Sep  18) – Sa layuning maipakita ang mabuting samahan ng mga Lumad, Muslim at Kristiyano sa lalawigan ng Cotabato, magiging tema ng itinatayong provincial museum ang pagkakaisa ng Tri-People.

Ito ang resulta ng 3-araw na Training and Workshop on Provincial Museum Conception na ginanap sa Annex Building, Provincial Capitol mula Sep. 16-18, 2014.

Partisipante sa naturang aktibidad ang mga key personnel ng Provincial Governor’s Office- Public Affairs Assistance Tourism Sports Development Division, Provincial Human Resource Management Office, Sangguniang Panlalawigan ng Cotabato, Provincial Governor’s Office Media Center, academe, civil society organization, Provincial Advisory Council.  

Dumalo rin sa aktibidad ang ilang mga representante mula sa DepEd Cot Division, non-government organization, civil society groups at iba pa upang maging multi-sektor ang ginagawang konsepto ng provincial museum.

Si Dr. Antonio Julian R. Montalvan II, Managing Director ng work-in-progress na A. Brown Museum na nakabase sa Cagayan de Oro City at dating Chairman ng National Committee on Museums ng National Commission for Culture and Arts ang resource speaker at trainer ng naturang training-workshop.

Ayon kay Dr. Montalvan, kapuri-puri ang napagkaisahan ng mga partisipante na gawing tema ng provincial museum ang pagkakaisa ng Tri-People o mga Lumad, Muslim at Kristiyano sa Cotabato Province.

Ito ay may magiging daan upang maipakita sa buong bansa na ang lalawigan ng Cotabato ay isang mapayapang lugar at nagkakaisa ang mga tao sa kabila ng pagkakaiba-iba ng relihiyon, paniniwala, tradisyon at kultura.

Paraan din daw ito, ayon pa kay Dr. Montalvan upang mabago ang negatibong imahe ng Cotabato Province bilang magulo at sentro ng digmaan.

At dahil pagkakaisa ang tema, napagkasunduan ng mga partisipante na i-display at pangalagaan sa provincial museum ang mga artifacts, heirlooms at iba pang sinaunang gamit na nagpapakita ng mayamang kultura at  pagkakaisa at mabuting samahan ng Tri-People tulad ng gamit pang-saka, musical instruments, kasuotan at iba pa.

Layon din ng training-workshop na patuloy na palakasin ang pagbubuklod-buklod ng mga Lumad, Kristiyano at Muslim sa lalawigan ng Cotabato at ipagpatuloy an pagkakaisa at mapayapang pamumuhay.

Pinag-aaralan na ngayon ang magiging pangalan ng provincial museum na  magrerepresenta ng pagkakaisa ng bawat mamamayan ng Cotabato.

Lahat ng natalakay sa training-workshop ay isusumite kay Gov. Emmylou “Lala” J. Taliño-Mendoza at sa Technical Working Group ng provincial museum para sa kaukulang pagrepaso at final approval. (JIMMY STA. CRUZ/PGO Media Center)